【新增內容】
去年升呢幸福人妻嘅鍾欣潼（阿嬌）今日38歲生日，佢正日應該同老公賴弘國過二人世界，話晒婚後首個生日，阿嬌嘅好姊妹同兄弟，即容祖兒、蔡卓妍（阿Sa）、鄭希怡（Yumiko）、關智斌（Kenny）等，佢哋噚晚約咗壽星女開P，賴弘國都有出席。

生日P除咗有氣球同蛋糕，阿Sa仲玩魔術氹阿嬌開心，佢好認真表演，阿Sa一邊示範，一邊話：「呢度有『碌』嘢，打開係阿嬌最鍾意嘅米奇。」阿嬌即回應阿Sa：「我最鍾意你，第二鍾意Michael（賴弘國）。」之後阿Sa打開一個長筒，當中有三件立體四方形，拼出米老鼠公仔，阿Sa將佢哋調轉再砌時，卻不慎穿崩，魔術表演要NG，但呢個搞笑魔術氹到大家都好開心。阿Sa仲將NG片段放上Ig分享，佢留言：「祝你日日都健康、美麗、快樂，Love U，一個出色嘅魔術師嘅絕密NG片段。」阿Sa仲貼咗同阿嬌嘴對嘴相片，好sweet。

祖兒都將開心相片share，佢今日凌晨Ig留言祝福阿嬌：「無論晴天雨天，我們都在一起親愛的嬌，生日快樂。又一個快樂的晚上，我的快樂來自我好姊妹的快樂，很好。」阿Sa回覆：「係咪『我的快樂來自我好姊妹的快樂？』定係『我的朋友來自我快樂的好姊妹？』」Yumiko都話要多謝阿Sa翻譯，網民即估祖兒醉爆出金句，但經阿Sa提點，佢立即更正。

經理人霍汶希人在北京，未能到場，佢雖然冇去，但佢都喺Ig貼咗相為阿嬌賀壽，並留言：「嬌嬌，生日快樂，永遠快樂又幸福。#梅蘭菊竹#我的三個寶貝」

另外，本來呢個應該係一個神秘生日Party，不過最後都被阿嬌發現咗，阿嬌話：「我哋whatsapp有個group，之前係for Kenny嘅生日group，佢個party完咗後就加番佢入個group，但有一日我突然發現我俾人踢咗出group，咁我都估到佢哋會幫我搞生日。」而踢阿嬌出group嗰個就係阿Sa，阿Sa話：「我周圍問其他人，阿嬌睇唔睇到佢俾我踢出group？哈哈」至於生日願望，阿嬌就話要保密。

精選娛聞，喺晒《娛果》
http://fb.com/appledailyent