全民造星III丨ANSONBEAN與陳葦璇力爭冠軍寶座 葉巧琳獲陳志雲拉票造勢
蘋果日報 2020/12/26 00:00
全民造星IIIANSONBEAN陳葦璇葉巧琳Cloud
ViuTV話題節目《全民造星III總決賽》將於今晚假九龍灣Star Hall舉行，與對上兩屆一樣將作現場直播，10強包括葉巧琳（Mischa）、Cloud（雲浩影）、陳葦璇、ANSONBEAN（陳毅燊）、KLAU（劉瑞祈）、Kimman（黃劍文）、CY（陳澤言）、NY（鍾諾言）、Ben（趙祥誠）和Alina（李靜蓮）將爭奪冠軍寶座，並由毛舜筠、鄧麗欣、王苑之和麥兆輝等擔任評判，至於評判和觀眾網上投票分數將各佔一半。
10強中，ANSONBEAN、Mischa和陳葦璇被視為三甲大熱，至於樣子甜美和儍大姐性格最討人喜愛的Cloud，和被封「折骨舞之神」的Ben都是黑馬之選。
現年19歲、貌似韓國舞王Rain的小鮮肉ANSONBEAN笑容燦爛，甚有觀眾緣，加上唱得跳得，遺傳了開舞蹈學校的母親林佩佩跳舞基因，而他本身又是「Style International Management」待出道藝人，是AngelaBaby、馮德倫、熊黛林和廖碧兒同門師弟，強大後台令他早已贏在起跑線。ANSONBEAN昨被《蘋果》問到決賽在即心情是否緊張時表示：「有小小緊張，但冇壓力嘅，都黎到最後一日比賽，都想好好enjoy。有冇方法減壓？又冇乜諗呢個問題，反而keep住去努力練習，希望將最好嘅畀大家睇到，發現自己對舞台嘅熱愛，透過呢個比賽係更加熾熱。」會否緊張到瞓唔着？他說：「因為每日練完都攰，返到屋企已經好攰即刻撻咗落床。」問睇好誰人奪得冠軍，ANSONBEAN表示睇好Kimman，認為對方由50強至今轉變很大，及覺得對方十分享受這個舞台。對於自己被封為大熱，ANSONBEAN表示：「真係衷心多謝大家，我會努力做好自己。」
35歲Mischa在演藝學院修音樂，唱功了得，是組合遊樂團主唱，前晚陳志雲主持網上節目《Stephen．傾》，邀請Mischa做嘉賓，順道為她造勢拉票。《蘋果》記者聯絡志雲，他大讚Mischa說：「佢好似一粒滄海遺珠，又好似一粒冚住嘅珍珠，佢曾受過傳統聲樂訓練，對聲音運用非常到家，佢有非常豐富嘅音樂知識，即使今次唔能夠成功攞得冠軍，對佢日後發展一定有幫助，因為大家會留意到佢音樂上造詣同修養。」不過志雲強調未有留意其他《造星III》參賽者演出，不清楚其他人水準和表現，所以難以作出任何比較。
《蘋果》昨日聯絡Mischa，問到比賽前夕心情如何時，她短訊回應：「又興奮又緊張，但無瞓唔着嘅，不過發夢都係背緊啲歌。由於今晚（昨晚）先踩台嘅關係，所以比較緊張，踩完台試好晒啲嘢就應該冇咁緊張。 我唔算係大熱啦，冇打算以比賽嘅心態去表演，只想以做演唱會嘅心態同大家一齊做好一個show。」而Mischa就表示個人會睇好Cloud勝出。
同樣被視為大熱的24歲陳葦璇，是女子歌唱組合As One出身，她昨日接受《蘋果》訪問時就表示對攞冠軍信心不大：「聽日決賽其實我今日嘅心情都係覺得未準備好，因為都會想有多啲時間再練好啲，緊張在於想自己個表現可以精準一點，我又冇瞓唔着嘅，因為呢排實在太攰，所以一返到屋企其實都好快瞓到豬咁。」陳葦璇表示自己會借煮食及聽音樂拉筋來減壓，她續說：「我覺得呢個時間好寧靜，可以畀自己好好放鬆一下。我對攞冠軍冇咩信心㗎，因為今次都係一半網民投票，所以鍾唔鍾意呢啲好主觀，都係盡力做好自己，唔好後悔就得啦！」而她個人最睇好Ben勝出。
《全民造星III》今晚舉行決賽。（電視截圖）
ANSONBEAN笑容燦爛，是《造星III》冠軍大熱。（電視截圖）
陳葦璇對攞冠軍信心不大。（電視截圖）
陳志雲前晚邀請Mischa做《Stephen．傾》嘉賓，順道為她造勢拉票。
被封「折骨舞之神」的Ben獲陳葦璇視為冠軍之選。
Cloud被視為黑馬。
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！