不少商界人士連日均向季陶批市建局「出口術」，向傳媒大爆該重建項目拒絕出售業權的業主身份。雖然市建局事後否認「放料」，但商界流傳「幕後黑手」是市建局高層，更有商界批張震遠處理今次事件「離晒大譜」，直言張也是商界出身，理應尊重私有產權乃資本主義社會、自由市場基石，若一個社會可以隨便用集體利益、無所不用其極想盡辦法剝奪個人產權，那和共產黨有何分別？
其實政府不少官員也對市建局今次做法頗不滿，有官員稱政府不斷叫政客、市民不要沉迷於民粹，要尊重制度與法律，市建局明知法律無法收舖，就改用民粹手法逼人賣舖，日後政府還好意思批評政客民粹？更有官員笑言，今次市建局收樓手法，「仲衰過某地產商喺大廈外面掛塊大紅布嚇啲業主賣樓」，又稱若日後有無良地產商有樣學樣，用相似手法收樓，「到時人哋大大聲話係學市建局，咁政府有乜可以講？仲點批評佢哋做法有問題？」
季陶