日本寫真界近期之所以咁興旺，除咗因為不斷湧現一班令男人口水大流嘅水着偶像之外，亦同佢哋肯不斷搞新花臣有關。
MEGUMI、根本春美、森廣子同北川友美四位來自「巨乳軍團」YellowCab事務所嘅女星，最近就殺入電玩界，破天荒同PlayStation2合作推出digital寫真集，前日四位靚女重齊齊出席記招，介紹呢一系列digital寫真集入面嘅數碼新技術，連我羅拉都大嚇一跳！

角度遠近任你睇
MEGUMI同三位姊妹前日喺東京秋葉原現身，同場當然唔少得例必跟到實嘅鬍鬚社長野田義治啦，據PS2嘅發言人所講，呢啲digital寫真集同一般PS2遊戲光碟冇分別，入面可以儲存一千本寫真嘅相片，大家可以用PS2嘅操縱器嚟控制寫真嘅角度，又可以拉近嚟睇，相當過癮。
MEGUMI前日喺台上即席示範嗰陣，特登closeup自己個巨胸畀大家睇，強調呢啲寫真嘅畫質相等於一般DVD嘅一點八倍，連佢哋身上嘅毛毛都可以睇得好清楚喎！MEGUMI又話，呢啲光碟可以將原本好多張靜止嘅寫真變成動畫，難怪坦言最初唔知PS2想搞乜嘅野田社長，睇完之後都歎為觀止啦！