【新增影片】
《ESPN》已經連續第七年喺NBA嘅新球季開始前，將聯盟入面嘅球員做1至100嘅排名。今日公佈嘅倒數第二批、即係第51至75位，合共25位球員當中，竟然出現咗紐約人當家球星安東尼（Carmelo Anthony）嘅大名。對於自己嘅排名只係得64，Melo當然係唔高興到一個點喇，即刻就喺個人Twitter向《ESPN》開火！

安東尼上季嘅排名係31，今年更加跌出前50，排喺第64，夾咗喺湖人新仔朗素波爾（Lonzo Ball）同埋塞爾特人嘅史馬特（Marcus Smart）嘅中間。咁嘅排名，Melo唔高興係意料中事，佢喺自己嘅Twitter向《ESPN》還擊果陣寫到：「對啲唔理智嘅事情，係唔可以理性解釋到㗎！」安東尼仲叫《ESPN》唔好咁公然做呢啲咁唔尊重球員嘅排名。Melo喺自己Instagram一個相同嘅post，再加多咗句充滿色彩嘅字句：「只要我知道自己仲係掂嘅，話_知佢喇，我就係自己嘅球迷。」

《ESPN》嘅解釋係：「#NBArank係一個新球季嘅推斷嚟嘅，安東尼喺2016/17球季嘅數字真係唔令人有太大期望，佢上季嘅PER（球員效率評分）只係得17.69，係佢自從加入聯盟第二季以嚟最低嘅，喺NBA排58，而且佢喺其他範疇都一樣跌緊watt。」

《ESPN》以前嘅排名都試過辣著其他球員㗎，2013年佢哋將前湖人球星拜恩（Kobe Bryant）排喺25位，一年後跌落40位，當時Kobe已經話搞呢個排名嘅人係一班白痴（a bunch of idiots）。2015年拜恩嘅排名更加暴跌到93，呢個時候嘅Kobe已經連回應都慳返，笑住話：「我唔需要為自己辯護」，又叫記者唔好再問關於排名嘅低能問題。

Kobe兩年前咁回應《ESPN》嘅 #NBArank↓↓
http://bit.ly/2vStnsP