愛華頓球星巴克里冇喺夏季轉會窗加盟車路士，根據祖爾巴頓透露，原來係因為車仔領隊干地喺轉會窗截止日熄咗電話，巴克里搵唔到干地所以臨陣退縮。

據報道，拖肥之前已經同意咗畀英格蘭中場巴克里以3,500萬鎊轉會費改投車仔，甚至有指佢已經去咗體測，不過之後巴克里否認咗有去體測。而曾經踢過曼城同紐卡素嘅祖爾巴頓就同《talkSPORT》講，巴克里唔上「車」嘅真相係，佢想喺簽約之前同領隊干地傾吓自己喺隊中嘅角色，但干地嘅電話一直打唔入！

祖爾巴頓話︰「我聽到有關巴克里單轉會交易嘅得意嘢，干地熄咗電話而巴克利嘅代表嘗試聯絡佢。巴克里想講『睇吓我要法邊度踢波』，而干地熄咗電話，就係咁令到巴克里臨陣退縮而唔簽約。佢認為如果領隊唔聽佢電話，好明顯對方並唔想要佢，呢個係佢留返喺愛華頓嘅原因。」