【李八方online】查毅超自爆做過童工 一見張建宗即嚇到口窒窒
張建宗查毅超磅秤大王李八方ONLINE
查毅超(右三)自爆87年就返深圳開廠,9歲賣塑膠機。易仰民攝
有「磅秤大王」之稱的科學園董事查毅超今年升呢做埋主席,佢接棒前公眾對佢都唔係好認識,上任後幾個月又未有大搞作。今日佢出席廠商會午餐會時竟然自爆做過「童工」,之係發現同場原來仲有之前做過勞工處處長同勞福局局長嘅政務司司長張建宗,查毅超即時口窒窒話「唔記得」喎!
查毅超喺專題討論時自爆,佢87年就返深圳開廠,9歲賣塑膠機添,又笑笑口話好彩當時冇勞工處喺到咋!不過佢講完就知道唔對路,因為台下有大大個張建宗坐咗喺度,真係唔知點反應。查毅超就驚叫咗句「啊,張司長喺度!」跟住口窒窒咁話「過去嘅嘢真係唔記得啦」,引得哄堂大笑。張建宗亦笑吓就算,始終咸豐年前嘅事,可能查生都係講吓笑,想公眾對佢留個深印象啫。
廠商會今日亦都透過午餐會發佈一本名為《中國改革開放的拓荒者》嘅書,講述11位喺改革開放時期返內地打拼嘅工業家嘅故事,在場嘅「富二代」廠商會副會長盧金榮都同八方分享佢嘅故事,話自己並唔係「繼承者們」,反而係「轉型者們」,皆因改革開放已經40年,今日嘅工業生態唔同晒,唔少以前返內地設廠嘅商家都慢慢走到東南亞,甚至去到非洲咁遠,新一代唔止講突破地域界限,仲要不斷應用唔同嘅科技,提升生產力。
廠商會透過午餐會發佈一本名為《中國改革開放的拓荒者》嘅書。易仰民攝