韓國大前日先後有三部電影開畫，當中包括趙寅成、南柱赫及雪炫嘅215億韓圜(約1.5億港元)大製作《安市城》、玄彬孖孫藝珍主演嘅《談判》及曹承佑同池晟主演嘅《明堂》。

首日票房爭持得好激烈，《安市城》成功撼贏兩片穩坐票房冠軍，《明堂》則緊隨其後奪單日票房亞軍，至於玄彬首次做奸角嘅《談判》首日已不敵第三位嘅《詭修女》（The Nun），《談判》首日票房只排第四位。

而到噚日，票房榜排名再有調動，當中《安市城》噚日單日有逾21萬名觀眾捧場，累計觀影人次逾49萬，繼續冧莊做票房冠軍，至於一直排亞軍嘅《明堂》，噚日亦終於失手，《詭修女》以11.8萬名觀眾成功撼贏《明堂》得票房亞軍；《明堂》就以11.4萬觀眾排單日票房榜第三位。至於玄彬及孫藝珍主演嘅《談判》就引9.9萬觀眾捧場，排單日票房榜第四位。

另外，玄彬同孫藝珍今日就合體谷片，唔知會唔會對票房有幫助呢？

精選韓流，喺晒《娛果》
http://fb.com/appledailyent