冇錯，又係林峯同「吳七愛」吳千語，兩人拍拖至今，一直喺人前晒恩愛晒到停唔到。之前有報道講到峯峯已為同千語BB結婚一事做好準備，千語BB日前仲飛埋去橫店，疑似要睇實峯峯，不過佢噚日就否認去監場。

今日又有最新消息喇，報道就話千語BB陪完峯峯拍劇，上周三(17號)單拖坐飛機返港，喺等飛機起飛嘅時候，有其他乘客目擊千語BB，喺度大聲講電話，方死人哋唔知電話裡頭又係峯峯。

咁啱麥玲玲師傅亦搭同一班機，仲坐喺千語BB前面，千語BB就打鐵趁熱，索性將個電話遞俾麥師傅，等佢同峯峯傾下，到攞番個電話喇， 千語BB就繼續大聲講，仲要係敏感話題，叫峯峯將自己時辰八字俾埋麥師傅，等佢擇個好日，甚至叫埋峯峯問佢雙親攞個八字，仲話飛機得半個鐘就起飛... 哇﹗態度好命令式囉﹗


報道之後提到，峯峯其實係堅愛千語BB，不過爸爸林華國就一直唔係好buy千語，叫林峯等吓先，又話千語仲細，咁一向乖乖仔嘅林峯，當然唔會逆爸爸意，難怪峯峯婚事上都採取拖字訣。

另外，吳千語同黃宗澤今日喺銅鑼灣出席機械人高達活動，被問男友林峯係咪鍾意高達時，佢就冷淡答：「你問番佢。」至於拍拖係咪淨係摸肚仔，冇其他活動？佢忍不住笑話：「同朋友食飯囉。」喂，好似同平時有啲唔同喎！


【動主播召喚敢你就來】
立即報名： http://anchor.nextmedia.com