唔經唔覺，曾主演韓劇《看見味道的少女》嘅男團JYJ成員朴有天已經服兵役4個多月，粉絲掛到佢死，要狂loop佢嘅歌先掂。好彩朴有天早有準備，宣佈將於本月18日推出首張個人迷你專輯《你的錢包裏有多少愛》，作為送畀粉絲嘅禮物。

呢隻碟入面收錄咗6首歌，除咗同名主打曲之外，仲有朴有天2013年於東京舞台上為粉絲獻上嘅自作曲《與她共走春天》現場版，事務所說：「朴有天上年8月入伍前，抽時間製作同錄製呢隻碟，作為送畀粉絲嘅特別禮物。」

話晒今次係朴有天入行以來首次以個人名義出碟，而且碟名又咁清楚問大家銀包有幾多愛，咁今日開始接受預訂，粉絲應該識做吧？