兩公婆嘅閨房事，邊個想俾人公開討論？如果「咁唔好彩」俾人擺咗上枱，你嘅反應會係：1)發爛渣、2)轉移話題、3)以笑遮尷尬？

台灣天王周杰倫老婆昆凌，只得23歲，就攀上人生勝利組嘅最高level，有老公錫仲生咗一個「好」字。

6月昆凌生完囝囝後，短短3個月，火速瘦番晒兼復工。日前佢就同英國男星奧蘭多布魯(Orlando Bloom)上節目，宣傳佢哋套新戲《極致追擊：龍鳳劫》。節目中，昆凌就俾奧蘭多爆料，話喺片場成日打電話俾老公。之後一班主持就越挖越深，講到周董無事三刻嚟片場探班時，其中一個主持突然驚醒問昆凌：「你是在片場懷孕的嗎？」

其他主持即七嘴八舌話：「你要拍很多場打戲？不累嗎……」(當然係話中有話)跟住另一主持就插嘴話：「昆凌累，但周杰倫不累嘛。」俾人逼到埋牆角嘅昆凌，就揀咗3)以笑遮尷尬。

之後昆凌就好似食咗誠實豆沙包咁答：「我的確是拍戲中途懷孕的！」之後佢仲話，套戲有好多打鬥同拳腳戲，拍完之後，自己先知有咗BB，真係嚇親周董囉！