當年今日
關於我們

中藥成效 - 左丁山

蘋果日報 2003/10/10 00:00


一位讀者鄧先生傳來治耳鳴嘅方法,叫左丁山轉交教育M(見本欄九月十三日),因教育M退休後得閒,去咗遊埠,左丁山搵唔到佢,故此鄧先生等得不耐煩,連續再傳真兩次去《蘋果》副刊,連《蘋果》都怪責埋。請鄧先生稍安無躁,你嘅資料一定會送到教育M手上,至於佢是否照單全收,要靠佢自己嘅判斷咯。其他五位讀者亦有治療方法送過嚟,謹此致謝。
午飯時間,編輯K等人請藥王陳食私房菜,茶餘飯後,自然提到中藥保健。編輯K問藥王陳:「食靈芝有冇用㗎?」藥王陳話:「當然有,西方研究證明多醣體有助抗癌,多醣體就係靈芝主要成份之一。靈芝分赤、紫、青、白、黑、黃共六種,每種嘅成份與功效,有些微分別,經我哋幾年來嘅研究,青芝(即靈芝)對剋制肝炎最有效果……」講到呢度,編輯K已急不及待:「我一位朋友係乙型肝炎帶菌者,目前非常健康,但心裏驚驚哋噃。」藥王陳話:「啱嘞,佢最好食青芝,防患於未然。嗱,赤芝呢……」正想聽落去,點知有人扯開咗話題,又聽到私房菜老闆唉聲嘆氣,佢主動同我哋講:「冇陰功咯,中秋節期間俾電盈停咗電話,搞到啲客人訂位,全部打唔通,損失咗好多生意!」原來電盈有職員(據講已離職)誤報私房菜購買新電話服務,冇畀錢,於是電盈「咳」線,搞一排先至恢復電話服務,老闆到𠵱家重係條氣唔順,猛咁向我哋吐苦水。