馬來西亞女星林明禎、導演趙善恆、樂隊ToNick，噚晚喺旺角街頭宣傳電影《救殭清道夫》，吸引好多市民圍觀，明禎特登練廣東歌同趙善恆喺街頭唱電影主題曲，因為佢唔識廣東話，所以要睇住貓紙唱，但都甩咀，事後佢有啲唔好意思話自己獻醜喇！問佢係咪好尷尬？明禎話：「好緊張，昨天才學，要用英文寫拼音，我不懂廣東話，不過拍戲比唱歌更緊張。」

明禎戲中演殭屍，佢話成日要彈吓彈吓，加上冇對白，要靠表情去演，所以特別難。不過導演就讚佢係一個勤力嘅女仔，拍戲之前特登去上堂，趙善恆話：「佢今次唱歌，事前都好勤力練習，仲練埋和音。」《救殭清道夫》3月至喺香港上映，所以明禎到時會再嚟香港做宣傳。

趙善恆就話想大家將佢呢部戲同麥浚龍嘅殭屍片做比較：「咁會多人關注，不過大家唔同類型，我部戲講90年代，有笑有驚，希望觀眾睇完會開心。」