學生Ｋ去到日本留學，第一件事就係去銀行開戶口，儲蓄與支票戶口兼備。點知銀行唔畀佢開支票戶口，儲蓄戶口就一定要用印章，唔信簽名。學生Ｋ唔識世界，覺得日本乜咁落後㗎，唔用支票都有嘅？
二十年前留學日本嘅財務Ｃ話：「日本人唔信支票，冇人肯收支票，只信（一）信用卡、（二）現金、（三）你個人，即熟客、熟人，好多帳單（如水電煤）都係自動轉帳扣數，喺儲蓄戶口扣數嘅。」佢講完，左丁山都係唔明，我哋慣咗用支票，冇支票點搞呀？點找數呀？財務Ｃ話：「美國人用支票太多，至氾濫程度，你估支票冇成本呀，印刷、郵寄、結算、支票回流，全部都需要處理，用好多錢㗎。日本人唔用支票，未必就係落後。」呢個問題無謂爭論，最實際問題，日本男人份薪水會由公司轉落太太戶口，太太每日畀零用錢，老公到銀座、新宿、六本木玩樂，點找數呀？扣儲蓄戶口，冇咁多錢；用現金，零用錢唔夠；用信用卡，老婆知道噃？

財務Ｃ話：「日本係男人世界，自有辦法，請賓架吉野講吓。」吉野先生笑笑口話：「我初出道時，每年春夏兩季銀行發花紅之日，就會分兩個信封，一封係拎返屋企畀太太嘅，一封係自己袋嘅。會所嘅媽媽生喺發放花紅之日，親自上嚟送禮畀老闆，老闆就會用自己花紅找數。平時去Club，媽媽生會記低消費額，唔使我哋即刻畀嘅，積積埋埋一次過清數，老婆唔知。」
咁都好杰啫，會所要「責數」半年，啲流動資金（workingcapital）少啲都唔掂，故此日本商界要互相放數，邊個撻數就牽連甚廣，冇聲譽之人，好難在商界立足。至於老公嘅花紅，你估日本女人唔知咩，隻眼開隻眼閉啫，揸得太緊，老公會變心㖭。