【想35歲前結婚】男友求婚使唔使好重手? Jeana:有金就最好
求婚何佩瑜蔡一鳳
蔡一鳳(Michelle)創辦嘅Marvella同珠寶品牌Larry Jewelry今日喺金鐘搞咗個珠寶展,吸引咗名模Ana R.、何佩瑜(Jeana)、朱李月華同丁子高等出席。
Jeana今日戴咗品牌二千萬珠寶現身,提到近況,佢就話即將去佛山拍戲,戲入面仲會着婚紗,問佢想唔想真係着婚紗同男友翁子光結婚?佢話:「希望35歲之前,o依家28歲,仲有6年,o依家事業為重,唔衝就太遲,我哋有共識,大家一齊衝先。」怕唔怕唔結就分?Jeana就話大家互相信任,唔會怕。至於兩個咁忙,點樣維繫感情?Jeana就話:「要神交力量,精神上一齊,傾電話。」佢仲話為咗爭取時間見面,都會同男友同居,再問佢如果男友求婚使唔使好重手?Jeana話:「講心就得,不過有金就最好,佢之前都送過戒指畀我,但冇乜含意。」
另外,Michelle嘅品牌第一次搞大型騷,搞到佢都有少少緊張,問佢又做珠寶又做手袋生意,老公盛品儒係咪慳番唔少?Michelle笑話:「有朋友叫佢送私人飛機,不過我鍾意自由自在,出trip都係坐民航機,坐私人飛機感覺冇咁自由。」至於造人計劃,Michelle就有所暗示話:「下年啦,唔講得住,收埋個秘密遲啲有驚喜。」