53歲嘅邵仲衡，入行多年，01年就同圈外女友Wendy結婚。講到佢嘅戀愛史，除咗曾同劉美娟相戀十年外，原來佢亦同邱淑貞拍過拖。

邵仲衡日前接受《一圈圈》訪問時，除咗講到因為劉美娟，而同劉青雪積怨外，亦提到入行後第一個公開嘅女朋友邱淑貞。邵仲衡話，當年仲係佢女友嘅邱淑貞參選港姐時，都游說佢參加同期舉行嘅《超級新星》，就係咁，佢哋都一齊加入娛樂圈。入行公開咗戀情，佢哋就分手。

娛樂圈生活多姿多彩，問佢係咪因為娛樂圈生活太多誘惑，所以先同邱淑貞分手？邵仲衡反指話自己係被飛嗰個：「係相等嘅，佢參加香港小姐，開咗另一扇門，見識咗另一個世界，又識咗唔同嘅人，然後大家走唔同嘅Path，大家都想開發展唔同嘅方向，大家唔啱傾就冇得傾㗎啦！」

活過半百，大家可能以為邵仲衡只有邱淑貞、劉美娟同太太Wendy，但事實並唔係咁樣㗎喎！佢話公開第一個圈中女友，即係邱淑貞，並唔係佢嘅初戀，仲話自己拍過n次拖先到邱淑貞：「我係經歷n次戀愛，先同大家所認識嘅第一個女友拍拖，其實咁多年，你哋所知抑或媒體講嘅戀情，坦白都只係Tip of the iceberg，只係冰山一角。」

邵仲衡仲誇口話：「其實真係好多(戀情)，多到好似走馬燈咁轉，依家回頭睇番，嘩！真係不枉此生！」咁主持人問佢咁多情史，佢又會點睇離離合合呢？佢笑話：「男歡女愛嘅事唔好睇得咁重，就算『掟煲』都係好閒事，我都會為分手而傷心，唔好忘記你撇人時，人哋都好傷心、好可憐㗎！」問佢又同幾多個講過分手同被分手時，佢就話：「唔好講呢啲啦！哈哈！但係之前每一個女朋友，我都係真心喜歡㗎！」