【患「漸凍人症」逾1年】吳博君手腳越趨無力 否認失資助搞眾籌
蘋果日報 2019/09/20 14:06
眾籌漸凍人症吳博君
吳博君去年3月突然證實患上漸凍人症。（資料圖片）
現年62歲的前無綫藝人吳博君，去年3月突然感到四肢無力癱瘓入院，經過醫生詳細檢查後證實患上罕有的運動神經細胞疾病（漸凍人症），最嚴重的時候要在床上解決大小二便。
吳博君患病期間，全由患有小兒麻痹的太太照顧他的日常生活。他曾向傳媒透露醫藥費龐大，每星期平均花費一千元看一次中醫，每月醫藥費則花費約一萬元。吳博君失去工作能力，幸有不少圈外圈內朋友出手幫助，包括劉德華、薛凱琪等。不過，吳博君已患病已有一段時間，演藝人協會便開了一個專戶幫吳博君籌錢，希望大家隨緣樂助，讓他度過難關，當中還透露：「早前有個有心人每月資助他，但最近開始停了資助。而博君的情況只申請到傷殘津貼，未能申請綜援，經濟上需要幫忙。」
《蘋果》今日聯絡到吳博君，起初由他的太太接聽電話，對於有報道指他們搞眾籌活動，她否認說：「之前有位有心人每月資助少少錢睇醫生交通費等，最近冇咗，我哋又未去到咁拮据，只係經濟上有少少壓力，所以搵演藝人協會幫手。佢哋好熱心，話幫我哋內部籌款，其實係內部通知一啲藝人，但安安姐（余安安）、薛凱琪比較熱心，喺佢哋facebook post咗出嚟，有人轉載就搞到好似網上眾籌咁。」
博君被問到病況？他氣弱柔絲說：「略為差咗少少，呢個病都係慢慢差落去，差到最後就完全唔郁得，當然唔希望見到呢一日啦。」博君現時出入需要坐電動輪椅，在家中亦要用四腳架支撐住行路，他續說：「其實呢排都好明顯，突然間弱咗好多，行起嚟冇咁有力，手都係，而家拎筷子同碗都唔係好得。」他亦否認搞眾籌：「經濟太大問題唔講得嘅，但都有多少壓力，因每月支出都好大吓。」這段時間最想多謝邊一位？他說：「要多謝嘅人太多，有少少嘢講出嚟，個個都好熱心幫，而我亦已盡我所能（克服病魔）。」
吳君博於70年代加入TVB，多數演出壞人、鹹濕佬等角色，97年受金融風暴影響被TVB裁走，為謀生計，他之後做過紙紮舖、麵包師傅、寫字樓清潔等不同行業。
吳博君在今年3月出席「藝進情濃30載」晚宴，需要坐輪椅。 （資料圖片）
近年全由太太照顧日常生活。（資料圖片）
有網站轉載帖文，疑為吳博君搞眾籌。（網上截圖）
吳博君多數演壞人、鹹濕佬等角色。（無綫電視截圖）
薛凱琪好重情義，曾暗地幫助吳博君度難關。 （資料圖片）