羅霖(Candy)今日喺會展出席亞太美容展活動,今日見Candy面腫腫,唔知係咪怕又再畀人話佢整容,所以自爆話:「因為我喉嚨發炎,令到眼腫、牙骹腫咗,係過濾性病毒同疲勞過度。我日日做嘢,唔整得容。」
問到經常被指「失修」,Candy就話:「唔驚,大家見到我真人就唔會相信,女性最重要保持均衡飲食,修得太多會唔自然。」講到先前佢都直認自己有微調,佢就話:「我之前做一間美容院代言,打咗一次蛋白溶線,但不宜太多太密,要適可而止。」
Candy話對醫學美容科技越嚟越有興趣,講到部專為收緊女性下體而研製嘅「收陰機」,生咗3個仔嘅Candy直認子宮有下垂情況,但依家都仲覺得尷尬,佢話等自己刻服咗心理障礙後,都會一試,但Candy就強調話:「為咗身體健康係值得去做,唔會為咗取悅他人。」問佢女性下體鬆弛係咪會影響夫妻關係?佢就話:「絕對有例子,我有個朋友真係為咗咁去做手術,我覺得好傻,唔好為咗取悅任何人而做。」