蘇麗珊(Cecilia)同游學修拍完電影《哪一天我們會飛》而走紅，一對小情人仲戲假情真，大方宣佈拍拖，人紅自然事非多，之前有報道話Cecilia推job，日前更有另一篇報道話佢同游學修因為拍戲撻著，因而雙雙狠飛另一半，仲搵到大批Cecilia同前度嘅生活照，又稱前度仲對佢念念不忘云云。

今朝Cecilia同導演黃修平去咗浸大出席一個電影論壇，對於報道，Cecilia回應:「我自己對呢啲報道唔係太上心，因為唔係全部屬實，我好佩服佢哋嘅創意，好多資料都係錯嘅，搞到我成篇嘢响度捉錯處咁。」同時佢又澄清自己唔係見異思遷:「我唔鍾意啲關係唔清楚，對上一段感情完咗約幾個月至半年左右，先同游學修開始。」

報道同時話游學修都係即刻狠飛前度，Cecilia就話唔係報道所寫咁，因為大家都同樣要求關係清清楚楚，仲講笑:「等我今晚返去再質問吓佢先。」

咁前度係咪仲對妳未忘情？Cecilia話:「咁我又唔知喎，不過一齊過咁耐，始終响大家心入面會有一個位置，依家大家都係一個友好關係。」

講到被人摷晒啲舊事嚟講，會唔會覺得好困擾？佢就好大方話:「我自己就無咩唔講得嘅，不過登晒人哋啲相出嚟，佢又唔係公眾人物，我怕影響到其他人。」