大家樂剋扣員工飯鐘，人工明加實減，俾市民狂插太刻薄。查實香港打工仔要求好卑微，要做個好老闆門檻好低，好似開美容店嘅黃女士，唔使扣夥計飯鐘錢，每個月淨畀5,000蚊一樣請到好員工，就算一星期返六日，每日10粒鐘，員工Icy一樣心甘命抵。

新移民有嘢學唔嫌低薪

19歲嘅Icy今年3月由內地嚟香港，當時廣東話都未識講嘅佢，搵份工仲難過搵老公。之後經救世軍就業轉介服務，成功搵到份美容助理。雖然每日返足10粒鐘，一星期得一日休息，平均時薪僅20蚊，不過Icy都好歡喜，笑笑口話家係學嘢階段，人工低啲唔緊要。
Icy家唔只學識美容常識，仲成日約同事出街，學識講流利廣東話同扮靚，自信心大增。老闆娘黃女士讚Icy肯學肯捱，好多客都鍾意佢，只要做夠一年，保證加佢超過一成人工。
好老闆自然值得表揚，仲要多得救世軍呢類咁慷慨嘅機構，黃女士噚日有份獲頒好僱主感謝狀。救世軍噚日舉行第七屆僱主感謝禮，表揚超過55間公司，一間被工會批評過刻薄員工嘅清潔公司都有份。