當年今日
關於我們

港視員工爆料 唐寧越南山區慈善訪無綫抽起唔播

蘋果日報 2013/11/29 06:00

無綫stephy唐寧方力申國際培幼會港視

今日唐寧、方力申及鄧麗欣(Stephy)到尖沙嘴出席國際培幼會活動,分享佢哋之前一齊去越南探訪當地嘅所見所感,希望能喚起大家關注當地未能就學嘅貧困家庭同小朋友、宣揚助養兒童計劃。唐寧此行更加係第二次隨培幼會探訪兒童,遠赴越南中部崑嵩山區,毋懼路程崎嶇,只為傳送愛心。

呢個節目,將於明日喺無綫播出,但據知屆時出鏡嘅,只有小方同Stephy;港視藝員唐寧,將會「被消失」,因為佢係港視藝人。

港視曾表明,俾旗下藝人自由於不同媒介及電視台亮相,所以佢哋可以亮相nowTV梁思浩個節目受訪,張松枝亦可接受有線專訪;如果某大台邀請佢哋現身,只要時間就到,當然無問題。但問題就係因為依家呢個節目喺無綫播出,有指唐寧會因此「被消失」。

港視員工今日於微博寫道:「今天國際培幼會為早前到越南崑嵩山區採訪小孩舉辦記者招待會,現場看見很多照片令我回想起當天的情景和面容等等⋯⋯但有點可惜因香港只有一個電視台,又因『一籃子』問題!所以你們未能在電視機上看見唐寧訪問五個家庭和可愛的孩子!但你們也要支持和收看呀!做善事不分你我的!」唐寧只簡單回應謂:「希望大家都支持國際培幼會。」

同屬港視嘅菁瑋,就為唐寧感不值:「因為在TVB播,藝人的慈善工作就要被裁掉?替師姐不值!唐寧的粉絲要失望了。」有網民即回應:「做善事不分你我!一樣會睇培幼會嘅節目,不過會等網上嘅資源,唔會幫某個台增加收視!」如果網上資源係myTV,咁一樣係計埋落收視0架。

無綫下封殺令,禁絕壹傳媒記者踏足電視城或採訪其藝人,被記者協會質疑打壓新聞自由。就連民政署喺荔枝角公園一期足球場舉行深水埗社企活動薈萃暨青年節啟動禮,亦拒絕《蘋果日報》記者入後台採訪。如果因為「門戶之見」而令國際培幼會之慈善節目亦要抽起唐寧部份,證明了甚麼?