全港受颱風「山竹」影響，賽馬方面，今天(16日)沙田馬場賽事取消，早上晨課當然亦不能進行，亦因為懸掛十號風球，馬會在中午呼籲員工不要返入馬房工作，大部分都不用上班。

不過，廐內馬匹依然要人照顧，其中練馬師葉楚航冒住橫風橫雨，一大朝早身先士卒入倉照料馬匹，與兩、三位員工一起打理倉內幾十匹馬，沖涼、清洗馬格、打料、餵馬匹食料，幾個人夾手夾腳做晒，朝早做完，下午又要做，親力親為就是要保障馬仔健康狀況良好。而葉楚航更與一匹新勝馬「霸勝」玩自拍。

其實一倉之主往往不易做，員工可打風放假，但練馬師就要事事跟到足，始終馬主信任交愛駒給你訓練，就一定要保障馬匹安全，令馬主在十號風球下亦不用擔心愛駒的狀況。