昨日內地A股午後「報復式」上升，上海及深圳股市都升超過2%，對於昨日升市，市場解釋有幾個版本，有說是內地出口維持強勁，有說是中信銀行（998）可能將獲注資，至於政策方面則有傳內地擬禁止基金經理買賣股指期貨，以及內地擬擴大融資融券試點等。
市場對於升市有太多解釋，一時之間都唔知信得邊個，不過假如睇完出口數據去炒中海集運（2866），不但無錢贏更加睇住個市升而隻股票跌，其他基金股亦都唔多跟大市，申洲國際（2313）及敏實集團（425）無端端跌6%，仲要以近全日低位報收，完全無視大市方向，可見今時今日炒股不止唔易搵食，更加係危機處處。

融資融券可刺激交投

反而較有機會炒作的應是內地券商股，據報道，中證監日前已經核准申銀萬國（218）等5家券商開展融資融券業務試點的申請。同時中證監還決定適當降低試點准入門檻，增加國元證券等15家券商開展融資融券試點準備工作。另外，中證監將按照既定工作方案，適時推出與券商融資融券業務相配套的轉融通業務。計及首批6家券商，首兩批試點券商共11家。
融資融券等於孖展借貸業務，令券商賺取額外利息收入，同時可令市場交易量增加，內地券商股應該長遠受惠，不妨睇位低撈申銀萬國與大福證券（665）等內地券商股。
申銀萬國昨日收2.95元，跌1%，大福證券收4.43元，升0.9%。
歐陽風