自從當奴喺北京，遭到蕭蔚雲等老人喺佢條頸輪流噬咬一啖，落嚟香港，講嘢開始學足中方嘴形，向港人傳聖旨，包括中方認為港人未深入了解《基本法》嘅「原則」及「內涵」，同埋上高有人質疑，唔支持23條立法，即是唔「愛國」。

子女讀牛津　愛邊一國
喺呢場「愛國六指琴魔音樂騷」之中，要夠實力，先至唔會中招。
如果想「港法治港」、「以法治國」，就係全面執行《基本法》條文。不過，按照中國國情，法治係冇可能實現嘅，一向人治兼輸打贏要，所以中方將已經變為骨灰嘅鄧小平、姬鵬飛等陰魂抬出來，將「鄧小平指示」、「姬鵬飛講話」凌駕於《基本法》條文之上，將《基本法》變為「姬本法」；將《中英聯合聲明》變為「鄧小平問米聲明」，再加埋土共霸位，親中舊電池奪權，有如長期飲咗雙氧水，心理唔平衡嘅文盲或半文盲維園阿伯集體發癲，呢一樣，原來就係「胡溫新政」嘅對特區最新政策。
究竟乜嘢先叫做「愛國者」？例如，身為國家領導人嘅霍英東寧願將個孫送去英國牛津讀大學，接受英國帝國殖民教育，都唔送去北京讀北大清華，呢樣又唔知係愛邊一國。董班子連乜嘢叫「中產階級」，都要由「中央政策研究組」「慢慢研究」，需時一年，並在研究之前，學中方咁，搶先定下「中產階級五大原則」，包括唔可以打麻雀，睇書唔可以睇食療湯水美容篇，一定要睇政治分析性書籍如馬克思、阿當屎密夫同埋托洛斯基著作等等。咁究竟乜嘢叫「愛國者」，廢董係咪應該成立一個「愛國定義諮詢委員會」，由佢自己做主席，諮詢研究番三五年，再向佢嘅中央提交「研究報告」？