內地碰瓷黨風氣蔓延香港！近日網上流傳一段車Cam影片，當中一架私家車沿着太子長沙灣道行車時，突然一個着住藍色外套、孭住斜孭袋嘅後生男仔，喺馬路邊行人路衝出路中撞落私家車。但私家車司機隨即落車同後生仔對質，對方見事敗仲好寸咁話：「過馬路唔得呀？」警方話到場前傷者已自行離開，案件列「糾紛」案處理。

段車Cam影片喺噚晚7點幾攝錄，當時私家沿長沙灣道向美孚方向行車，到界限街相交嘅路口時，一個後生仔原本企喺左邊行人路，但佢趁架車仲有幾米就駛到時，突然跑出去馬路，然後放慢腳步，擺好姿勢準備撞車。

私家車司機雖然已經減速，但仍然被後生仔主動側身右邊撞上車頭冚，再滾到地上。車上一個女乘客即刻大聲尖叫：「嘩！」司機就爆粗罵人，停車後落去質問後生仔：「你玩咩呀喺度？」後生仔回答：「過馬路唔得呀？」」司機於是再問多次後生仔「玩咩」，對方都只回應「過馬路唔得呀？」

車Cam影片冇交代到事件點收科，但網上流傳另一段影片，聲稱係私家車司機嘅對話內容，片中有人指事後曾追住被撞後生仔，不過被一個疑似同黨嘅女仔阻撓，話「我推開條女，佢嗌非禮」，又指私家車車身被撞凹，事後已報警，有警察到場影相記錄，引述警察指「追唔追究都要報交通，因為撞咗，如果追究就要去差館落口供。」

警方發言人表示， 噚晚7點47分收到一個55歲姓謝嘅男人報案，指由尖沙嘴彌敦道開車去美孚時，至長沙灣道同界限街交界時，有一個大約20至30歲嘅男人突然跳出嚟，兩人因碰撞問題爭執，該名男子沒有受傷自行離去。警員經初步調查，將案件列作求警調查，交由深水埗警區人員跟進。

你敢爆，我敢獎！ 立即WhatsApp《蘋果》24小時爆相爆片熱線 或致電：63836568