當年今日
關於我們

【我的置業故事】90後婚後寄居外母家四年 閨房禁聲很難過

蘋果日報 2020/06/04 00:00

蘋果驗樓房協沙田綠怡雅苑

「同朋友傾嘅時候都話,你哋真係要搬出嚟住!因為同屋企人住,唔通你……即係……夜晚……你都要忍住咩……啲聲。」90後吳太在說4年前新婚後,帶丈夫來母親單位居住,缺乏私人空間,感嘆閨房之苦。捱足幾個月,幸運地抽中市價七折定價的房協沙田綠怡雅苑,感覺猶如中六合彩,最終以379萬元買入一個實用513方呎的兩房單位。4年來疊埋心水等收樓,望穿秋水,上月終於收樓,吳氏伉儷表示將會努力「造人」。祝福他們,一擊即中。

吳太認為婚姻與買樓是兩回事,不像其他都市女性,腦海沒有「有樓先結婚」或「無樓不結婚」的價值觀。她表示,不想將買樓與結婚掛鈎,加上只要有地方住,母親亦不介意,所以當時沒決定要買樓,目標是先完成結婚這個"big task"。

吳太父親早年過身,哥哥早已自置居所,娘家400多方呎兩房單位就她和媽媽兩人居住。她說,以前媽咪住大房,她住細房,自己結婚後,跟媽媽交換房間。男士搬去和外母同住,吳生認為:「OK嘅,冇乜壓力,男人同外母唔同婆媳關係,我覺得容易相處。So far成件事唔會變得好僵。」吳太隨即接着說:「結咗婚,頭幾個月,我覺得好辛苦喎,我夾喺中間,開始時大家生活習慣唔同,媽咪會話:『同你老公講,唔可以點點點呀!』我又要同老公講返,令我夾喺中間。咁我老公都係一個容易相處嘅人。」

前路茫茫時,吳太曾經找過哥哥訴苦說,不知要住多久,不知何時夠錢買樓!她引述當時哥哥回應,建議他抽居屋,因為當年爸媽都是抽居屋抽中舊居。然而吳太跟吳生拍拖時,曾以個人名義抽過兩、三次資助房屋都杳無音訊,記得抽過青衣綠悠雅苑,婚後以家庭名義申請,當時只是嘗試一下,因為純粹只需交份表。抽不中怎麼辦?她稱,當時諗過去新界大西北買樓,「同媽咪住頭幾個月係最辛苦,同朋友傾嘅時候都話,你哋真係要搬出嚟住。因為同屋企人住,唔通你……即係……夜晚……你都要忍住咩……啲聲。所以都諗過,不如辛苦啲,租樓住啦!」

沒料到婚後5個月,房協公佈綠怡雅苑抽籤結果,他們中頭籌,吳太仍記得當日興奮的心情:「嗰吓,唔相信,竟然第一次用家庭名義就抽到,而且嗰陣結咗婚半年都未夠,真係好好彩。」吳生補充:「好似中六合彩咁!由結婚到買樓,我都覺得自己好好彩!」儘管與家人居住,且樓花期長達4年,吳生表示,「叠埋心水,呢幾年時間努力儲錢。我哋嘅信念係,喺唔同時期都過來望一望,睇吓起到幾多樓呢。」上月底終於收樓,「等咗4年,實用面積513方呎喺我想像中係好大,但又唔覺。大致上單位好四正,好滿意,我會畀100分呀!」他們不諱言,有了安樂窩,未來會努力「造人」。
房協綠怡雅苑漏水空心磚批盪空鼓全中 外牆瓷磚仲飛甩
吳氏夫婦等足4年的沙田綠怡雅苑終於收樓,吳生驗樓前畀100分,但睇過詹濟南驗完後,着令記者「唔該幫我改咗佢,無100分呀!」事關這個實用513方呎的兩房單位,印證一份錢一份貨,詹Sir評核單位15項工種,最終3項捧蛋、兩項不及格,得46分,他認為:「有人話『資助房300幾萬抽中咪算好彩囉!』,但我就認為唔應該咁諗,抽中都要畀返啲合理嘅嘢人。」詳細驗樓報告現分述如下:

1:來去水(0分)
廚房無漏水,但廁所3個位,漏晒水!企缸淋浴水龍頭鬆,漏水!坐廁水箱水喉接駁位鬆,漏水,仲漏到倒水咁款。洗手盆塞膠開關棒頭少粒「的」,差點被鎅見血。詹Sir徒弟康仔驗過廁所來去水一輪,發現洗手盆水掣好難閂,詹Sir覆檢話:「唔係難閂,係壞咗!」他還很勞氣說:「零分呀!」單位按市價七折定價,成交價約379萬元,他回應:「有人話『資助房300幾萬抽中咪算好彩囉!』,但我就認為唔應該咁諗,抽中都要畀返啲合理嘅嘢人。水掣閂唔實,唔合理!漏水,唔合理!」

2:窗(0分)
全屋近乎全部窗框都傾斜,「業主只能忍,忍到永久,忍到賣樓。(點解決?)無得救,總之我見過拆親窗框之後,都無好結果。算啦,裝窗廉布阻咗佢啦。」他轉身指旁邊客廳與露台之間趟門,「扣大分喇!你睇,離罅,打風會滲水。調較吓個鎖就得。」他着令遞來一張A4紙,突然詩興大發寫上:「青山綠水門漏水」,事關對出有座青山,而紙張竟可輕鬆攝入門罅,視為手工失敗。

3:鋪磚(0分)
廁所企缸邊一塊瓷磚完全崩裂,放心,不會滲水。但客房托住窗口式冷氣機的簷篷瓦仔就大件事,約1平方吋瓦仔竟然飛甩,幸好着地於單位露台上。

4:批盪(4分,不及格)
客廳及廚房牆身都有一處空鼓,不難處理。而主人房牆身兩邊窄,中間闊,形狀不平衡,俗稱「大肚」。恭喜業主?業主欲求老婆「大肚」而不是房間「大肚」,那麼房間「大肚」如何修補,詹Sir建議,誤差不大,無奈接受。

5:地板(5.5分。及格都要講?要,長知識。)
細房有一塊地板高低不平,俗稱「起級」,反映入榫位唔靚,此位置要更換的後遺症不大,可以更換。而且地板多處發黑,記住發黑與發霉不同,很多人看見地板發黑誤以為是滲水,其實好少機會是隔籬廁所滲過來,因為牆身之間都有造防水層。目前地板發黑是做地板前盪地方,因地台水氣高,鋪地板後,水氣滲入地板所致,那麼要更換地板嗎?詹Sir認為,都有少部份唔使換。

6:家電(2.5分,不及格)
冷氣機去水喉甩咗,情況蝦碌,後果都煩,需要筆錄。

7:設計(不計分都想奉勸其他業主注意吓,因極危險!)
抽氣扇射燈勁危險,熱力爆燈,熱到連筆身膠質都熔掉,溫度計探吓,嘩!高達207度……252度……哎呀……過熱,死機!呢盞燈有潛在危險。詹Sir表示,曾經測試某石英燈,持續照射8小時,可以令一個兩毫子硬幣表面出現熔化。建議各位業主開抽氣扇不要着燈,甚或換燈。

總結:46分
業主吳生表示:「失望囉,因為頭先望落去畀100分,結果咁低分,咁多嘢要執漏,瓦仔仲跌埋落嚟。」詹Sir安慰業主:「實而不華還不華,都要啱標準。不過都好過我嗰陣嘅夾屋啦,呢度一半都唔到呀。」不過瓦仔飛落街隨時中頭獎,慣性幽默的詹Sir反諷道:「行街我驚被人打穿個頭,呢度行出街,瓦仔最多跌落牆邊㗎啫!」不過房協最好搵人檢驗吓外牆。

房協回應,已主動聯絡業主,並剛於5月30日收到業主的修繕申報表,將仔細了解各修繕項目,並盡快作出適切的跟進。為讓業主在收樓後有充足時間提出單位修繕項目,已安排為期半年的修繕期。在收到業主的修繕申報後,會盡快處理,一般情況可於21日內完成執修工程。如需額外預訂修繕材料,則有機會需時較長。

採訪:陳家雄、張嘉鎣
編撰、旁白:張嘉鎣
攝影:Jack Lee
剪接、後期:Kalong
-----------------------------
打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新
-----------------------------
屬於香港人的移民攻略
立即登入【全球樓行】
Dream House零距離
empty
90後吳太在說4年前新婚後,帶丈夫來母親單位居住,缺乏私人空間,感嘆閨房之苦。
empty
吳太認為婚姻與買樓是兩回事,不像其他都市女性,腦海沒有「有樓先結婚」或「無樓不結婚」的價值觀。
empty
吳太表示:「同朋友傾嘅時候都話,你哋真係要搬出嚟住!因為同屋企人住,唔通你……即係……夜晚……你都要忍住咩……啲聲。」
empty
幸運地抽中市價七折定價的房協沙田綠怡雅苑,最終以379萬元買入一個實用513方呎的兩房單位。
empty
樓花期長達4年,上月底終於收樓。
empty
抽氣扇射燈勁危險,熱到連筆身膠質都熔掉。
empty
企缸淋浴水龍頭鬆,漏水!
empty
坐廁水箱水喉接駁位鬆,漏水,仲漏到倒水咁款。
empty
發現洗手盆水掣好難閂,詹Sir覆檢話:「唔係難閂,係壞咗!」
empty
廁所企缸邊一塊瓷磚完全崩裂。
empty
客房托住窗口式冷氣機的簷篷瓦仔大件事,約1平方吋瓦仔竟然飛甩,幸好着地於單位露台上。
empty
冷氣機去水喉甩咗,情況蝦碌,後果都煩。
empty
詹Sir評核單位15項工種,最終3項捧蛋、兩項不及格,他認為:「有人話『資助房300幾萬抽中咪算好彩囉!』,但我認為抽中都要畀返啲合理嘅嘢人。」
empty
單位得分46分,吳生表示:「失望囉,因為頭先望落去畀100分,結果咁低分,咁多嘢要執漏,瓦仔仲跌埋落嚟。」