當年今日
關於我們

【李八方online】劉江華冧掂商會 設小組傾油麻地果欄活化

蘋果日報 2018/02/07 17:54

李八方劉江華油麻地果欄

娥特一聲令下要跟進,民政事務局局長劉江華即刻約見商會傾油麻地果欄活化。原來欄王同欄商噚日終於見面,而欄商似乎亦被冧掂,九龍果菜同業商會會後仲出聲明話支持政府活化保育。
商會喺聲明中指,會配合政府、區議會一齊做好活化,共建可以推動本地經濟、又能夠吸引遊客嘅新油麻地地標。當然啦,商會都想政府喺唔影響公眾嘅前提下,幫助受前年果欄大火影響嘅災民進行臨時營運。地政總署更已經喺欄內發出通告,話當局即將收回呢個建築物以進行活動,職員會就戶口進行凍結登記。
果欄問題講咗咁耐,連審計署都就搬置問題批評過3次,家陣終於有聲氣,劉江華總算交到少少功課。民政局發言人回應,好高興業界同持份者支持活化,當局會成立以當區民政事務專員、區議會為核心嘅聯絡小組去同商會傾活化。個頭開得似乎唔錯,之後點發展先至真正考驗欄王嘅功力。