賭王何鴻燊四房孻子何猷君同新加坡富商、西甲華倫西亞班主林榮福嗰千金KimmyLim自從撻着後，甜蜜程度一直爆燈，剛過去嘅復活節，Kimmy就嚟咗香港，探佢嘅富二代好朋友嚴紀雯，今晚嚴紀雯去中環出席adidas新鋪派對，佢就漏口風話Kimmy將會再嚟香港，唔知到時猷君會唔會返港會佳人呢！

大騷長腿嘅嚴紀雯，就話最近自己清減咗好多喎：「我剝咗4隻智慧齒，所以就瘦晒，係兩三個禮拜裏面瘦咗七磅。」問到猷君女友Kimmy係咪黎咗香港？佢答：「我哋係好朋友嘛，遲啲啦，佢會嚟香港，係有計劃，會出席一啲活動，見下大家囉！」追問佢係咪嚟香港可以同猷君拍下拖？嚴紀文就答：「唔關事嘅，佢都有做其他事嘅，唔止拍拖嘅，佢喺韓國都有嘢做架！」

提到Kimmy剛來過香港，但猷君唔係香港，所以由佢嚟招待Kimmy，佢就笑住話：「你哋又知猷君唔喺到，我係唔係都會陪佢o架啦！」再問佢哋係咪拍拖拍得好甜蜜，嚴紀雯話：「佢哋好好。」咁佢哋結婚係咪會做伴娘？嚴紀雯聽到即刻嚇到咳咗幾聲：「唔會o掛，第一佢哋唔會咁快結婚，第二佢哋都無同我講要我做伴娘，第三就係大家諗得太多喇！佢哋都仲細，相信無咁快，係都我先啦！猷君仲細過我，我係大過超盈架，我係姐姐嚟o架！」

另外，同場嘅曾昭怡就撇低囡囡出席活動，佢話：「個女差不多六個月大喇，已經有18磅，一直全母乳，下個月就會開始食糊仔，希望六、七月中，開始減少(母乳)。」講到之前官恩娜於於酒店餵哺母乳時，慘被歧視，問佢有無呢啲不快經歷，佢話：「好彩我無試過囉，o依家做咗媽咪先知餵奶係咁辛苦架！但係我都會堅持，因為老公都好支持，會比我發下脾氣，但最辛苦嘅時間都已經過咗喇。」

囡囡就嚟1歲，問到佢會唔會同佢搞個生日會，曾昭怡話：「我覺得個小朋友都唔知發生乜事，係自己啲朋友多啲囉，都係順其自然啦，或者同屋企人食餐飯呀！」好友邢嘉倩快做媽媽，佢都好興奮咁話：「係呀，我哋都會成日傾呀！因為佢係我個女嘅契媽。」問佢會唔會做番邢嘉倩個BB嘅契媽時，佢即話：「咁樣好似好怪，我個女叫佢契媽，我又叫佢小朋友做阿仔或者阿女。但我哋未傾過呀，但點都會對佢小朋友好似契仔契女咁對待。」