日本有個流亡中國「正虎」，國際關注。冇錯，係「正虎」，唔係政府，因為佢係屢遭中方拒絕入境而被迫流亡於東京成田機場嘅馮正虎。呢位上海維權人士嘅《機場客運站》式遭遇，已經喚起日本人嘅同情：國產湯漢斯仲肩負起促進中日友誼嘅重任，流亡期間唔覺意做咗我國駐日邊境大使㖭，Ichiban。
強國河蟹至上，容不下不同聲音，馮正虎去年因為出書聲討上海司法不公受到拘禁，今年釋放後去日本休養，此後八次回家都被拒絕入境。今個月，流亡正虎再被遣返日本之後，索性拒絕重入日本國境，喺機場禁區打躉，直至日本航空公司願意載佢返上海、中國政府又畀佢入境為止。

替旅客填寫入境表

流亡正虎已經滯留喺成田機場12日，空港裏面嘅大小職員都認得佢。呢單政治版《機場客運站》上演咁耐越來越多人留意，法新社、朝日新聞等大型傳媒機構先後報道。馮正虎未必有湯漢斯飾演嘅Viktor咁有魅力贏得美人歸，但係成田空港一樣因為佢變得溫情洋溢。
是咁的，人來人往嘅入境大堂，成日有旅客遇上各種疑難。馮正虎曾經留學日本，略懂日語，好多旅客唔識路或者唔識填寫入境表，喺入境大堂附近打躉嘅馮正虎都會幫忙。將錯就錯流亡正虎竟然成為非官方機場大使，佢同八方講笑，話家陣好似幫機場打工。
機場公司深受感動，日前送咗啲食物畀佢，中日友好關係升呢。不過家有妻兒嘅馮正虎並無以此為榮，反而覺得係中國嘅恥辱，事關成田空港嘅溫情故事，都係源於中國政府拒絕一位良心公民入境嘅可悲現實。無論如何，流亡正虎嘅遭遇感動無數海內外同胞，包括港大研究生陳巧文。

陳巧文不適仍送暖

陳巧文前日送咗一批物資畀馮正虎，佢同八方講，呢兩日其實好唔舒服，上機落機都見頭暈兼喉痛，不過知道馮正虎咁辛苦都可以捱落去，個人小小苦楚又算係乜？所以堅持完成任務。陳巧文喺港大有導師職務在身，唔係隨時行得開，佢話以後接濟流亡正虎嘅任務靠晒支聯會。
mailto:[email protected]