江若琳噚晚喺九展開演唱會，圈中有唔少朋友都有拍片支持佢，好似有Hotcha、周柏豪、鍾舒漫、洪卓立、陳柏宇、小肥等，小肥就話：「江若琳係一個粗人，但我會叫佢大佬，佢粗得嚟好講義氣，人又靚。」周柏豪話：「佢份人好有義氣，又好錫屋企人，個人冇乜所謂，我仲拍過佢個MV，佢係第一個搞我腳趾嘅人。」Hotcha嘅Regen就話：「佢好靚女，但係真係好似個男仔，不過對人好好。」而Hotcha嘅Crystal更表示：「好多時想搵人傾偈嘅時候佢都會出現，仲試過自己冇乜衫著嘅時候佢仲會俾啲衫我著。」

而江若琳之後就出場，專門唱番幾位圈中好友嘅歌，之後更感謝佢哋嘅支持：「我哋幾個有個WhatsApp群組，大家都會傾下近況，人越大就會經歷得越多，當出事嘅時候好多人會話『同江若琳唔係好熟』，好多謝呢一班朋友。」之後江若琳更加專門揀咗男朋友Oscar嘅《背上的肖像》，佢話：「雖然今日你已經冇再拎起咪唱歌，但係我好想唱呢一首歌俾大家聽，等大家知道你有一首咁好聽嘅歌。」

而之後江若琳就除鞋赤腳同男朋友Oscar一齊跳《One and Only》，兩人跳舞期間有唔少親密動作，江若琳瞓喺Oscar大髀上面，之後Oscar就抱起江若琳轉圈，兩人最後手拖手一齊返入後台。

而一班朋友就繼續拍片講江若琳同Oscar嘅戀事，洪卓立篤爆，嗰時Oscar成日約食飯，有時Oscar喺度，江若琳又會喺度，o依家就明晒啦，原來係借佢哋過橋。小肥就話有次食完飯見到兩人Kiss，第一下唔知咩事，Kiss第二下先知原來係拍拖。陳柏宇就話拍拖最初好秘密，直到開舖時見到佢手臂上有個E字紋身。