今日Blue Monday又係打工仔開始捱世界嘅開始，晨早出門口返工，抬頭望下個天，見到維港上空好似分開咗一半咁，一半藍天一半雲層，畫面好得意，即時為沉鬱嘅心情帶嚟一啲朝氣，唔少人都停低腳步、或者喺車喺船上影低咁靚嘅一刻。

馬先生今朝7點半，喺尖沙嘴搭船去中環期間，見到維港上空好似一分為二咁，九龍區晴空萬里、港島區嗰邊就有雲層，好似一條分界線咁，佢覺得比較少見，於是影低佢。翁先生亦喺差唔多時間，行經中環國際金融中心行人天橋，見到天空雲層好特別，佢形容好似兩種天氣交接咁。

巿民Peter Chiu亦都喺九龍灣拍咗一條縮時片段，影住維港上空濕潤雲層，畀南下乾燥嘅冷空氣擊退，雲層與冷空氣嘅交界壁壘分明，劏開藍天嘅經過。佢將片段上載去天文台「社區天氣觀測計劃 CWOS」facebook群組，香港天文台台長岑智明都有分享，形容畫面有如「半邊天」。

天有異象，莫非有乜嘢啟示?天文台科學主任李子維解釋，呢個現象，其實係因為乾燥嘅東北季候風，正為華南帶嚟普遍晴朗嘅天氣，而乾燥嘅東北季候風，將我哋頭頂嘅雲層向南推，喺季候風同雲層之間造成分界，形成好似兩邊天咁，呢個現象其實都算普遍。

李子維補充，乾燥東北季候風今日(18號)仍然繼續影響本港，所以今日本港大致天晴乾燥，因為今晚(17號)雲量唔多，晚間輻射量比較明顯嘅情況之下，今日巿區氣溫應該最低17度，新界會再低幾度。巿民除咗睇千變萬化嘅天空，都要睇住溫度嚟着衫喇。

你敢爆，我敢獎！ 立即WhatsApp《蘋果》24小時爆相爆片熱線 或致電：63836568