日本上位男星竹內涼真今日為宣傳寫真集《1mm》喺東京舉行握手會，呢日只得1,500個名額，卻引來1萬3,000個粉絲申請爭崩頭，所以寫真集出咗唔夠一星期已經要加印，好誇張，佢除咗握手仲有同粉絲合照。

竹內涼真有份參演正播放嘅劇集《過份受保護的加穗子》同《雛鳥》，佢都話出街都多咗人認得佢，甚至多咗婆婆級粉絲。而今次寫真集，除咗有露肉相，竹內涼真仲去咗台灣取景三日，佢就話好鐘意台灣，現場有記者就關心佢嘅感情狀況，問竹內涼真心目中有冇好想一齊分享寫真集嘅重要女生，竹內涼真話好搞笑咁話：「就算有，你覺得我會喺呢度答『有』嗎？」