建制派WhatsApp對話全面通晒天，邊個指揮、邊個貼龜，一眼睇晒！到底689，誰是爆料兇手，財經版唔討論住。反而想講吓WhatsApp對建制派來講，點解唔應該用！

首先，WhatsApp一個GroupChat最多可以有100人，建制派個Group，點都有廿幾人啩。人哋話夜場無真愛，官場更加係各懷鬼胎。喺個Group入面講部署，句句都有機會成為政治深水炸彈，你點知邊個會做二五仔爆你大鑊？

正正因為「閱後即焚」呢個功能對唔同人非常有用，所以提供呢個功能嘅Snapchat，估值先越來越高！Snapchat上月底進行最新一輪融資，籌到5.37億美金，有傳有份參與今次融資嘅投資者，更包括阿里巴巴及2間對沖基金。今次融資的估值高達160億美金，比上年12月時嘅估值已高60%。

以160億元美金計，呢個銀碼已越來越接近Facebook收購WhatsApp個價錢，即係190億美金。

查實facebook都曾經想收購Snapchat，2013年時，facebook開價30億美金收購，但竟然俾個創辦人EvanSpiegel拒絕，震驚市場。事實證明，EvanSpiegel當時嘅決定係正確嘅。

不過，如果當年Facebook成功買到Snapchat，今時今日建制派就可能用到WhatsApp嘅「閱後即焚」功能啦，如果佢哋識用的話…

呀！唔係，Facebook、WhatsApp、Snapchat全部都係美國軟件，用佢算唔算勾結外國勢力呢？（誤）當然，除咗SnapChat，LINE、阿里巴巴開發嘅「來往」都有閱後即焚，至於騰訊（700）開發嘅微信，則有「回收」功能，可成功撤回兩分鐘內發出的最後一則訊息。