日本男星小栗旬大前年同名模山田優結婚之後，上年10月就首次做老竇，一向被指好爛滾嘅佢，做咗老竇之後反而好似修心養性咗啲，少咗佢四圍蒲嘅消息，而且日前佢仲被拍到同老婆山田優一齊湊女出街嘅相，不過，小栗旬竟然要捱鬧。

話說早幾日出版嘅八卦雜誌《女性自身》，拍到小栗同山田帶囡囡行公園，不過，小栗就單手抱B，仲好似用手夾住B女咁。網民即刻鬧佢唔識得湊女，咁樣抱法會令到1歲幾嘅BB女唔舒適，而且有危險等等，叫佢應該學吓抱B正確姿勢。其實山田優喺B女幾個月大時帶埋B女去居酒屋，亦都俾人鬧過。

而搞笑藝人岡村隆史今日仲喺Instagram上載咗張相，係佢同小栗旬、妻夫木聰三人合照，原來佢哋約埋一齊食飯，幾個人嘅粉絲都話估唔到佢哋原來咁friend。