日本TBS電視台重頭新劇《陸王》安排下月15日開播，同名原著係《半澤直樹》、《下町火箭》作家池井戶潤嘅作品，TBS再次標榜《半澤直樹》班底，望以強勁陣容取得驕人成績。

《陸王》故事講述百年老店「KOHAZE屋」一直製造傳統足袋，可惜時代令生意不斷減少，影帝役所廣司飾演主角係第四代社長，由佢領導20個員工開發新商品「裸足感」慢跑鞋為公司轉型，並展開翻生計劃。除役所廣司外，仲有老牌藝人寺尾聰參演，小鮮肉男星山崎賢人扮演役所廣司兒子，而另一當紅男星竹內涼真就扮演田徑選手茂木裕人，竹內涼真以往都曾參演池井戶潤劇集《下町火箭》，今次再拍住好戲之人，令《陸王》成為秋季矚目新劇之一。

《陸王》安排逢星期日晚上9時播出，近日役所廣司帶同山崎賢人、竹內涼真現身節目谷劇，役所形容兩位小鮮肉係「新貨」，由於包括自己在內嘅劇中演員都一把年紀，役所認為有兩位後輩演出帶來新鮮感，竹內涼真受訪期間談到曾經視職業足球員為目標，仲公開當年照片，佢仲話由細到大都好怕食新鮮蕃茄，尤其食落去嘅口感，不過茄汁就例外。