【金手指】英國政府的豪賭:老人要即走(孫柏文)
孫柏文英國政府
孫柏文︰英國政府宣佈咗進行一次攞佢哋六千幾萬國民生命嘅一場豪賭。
孫柏文作為一個由中三開始已賭馬嘅人,對賭錢(唔係贏錢)有好多經驗。而唯一可以賭得有值博率,就係要你知嘅嘢,多過街邊嘅人,舐盡「資訊不對稱 information asymmetry」嘅「租rent」,仲要舐到多到要克服馬會向所有賭徒收嘅百分之十幾佣。
難?當然啦。因為就算你收嘅風好齊,都未必係堅料。你始終唔係晨操騎喺馬背嗰個,唔係每日倒飼料落個兜餵馬嗰個,更唔係最後會見到隻衰仔有冇食晒嗰個等等。
咁關英國政府咩事?佢哋尋日宣佈咗進行一次攞佢哋六千幾萬國民生命嘅一場豪賭。
點賭?全球政府到今日,最重要嘅政策議題一定係點對付武漢肺炎。而當例如香港(除非抵觸「一國大晒」原則外)、新加坡等,都仲係諗點樣令中招人數有咁少得咁少,英國政府就唔同。
可能因佢哋見慣大場面,見香港、新加坡呢啲「打地鼠式」嘅抗疫政策係做唔得耐。左膠話齋,「冇持續性」。所以玩開帝國政治嘅英國,就諗終極方案。
首先,雖然佢哋覺得可能有藥醫,亦可能有疫苗,不過個政策豪賭假設係武肺會永遠存在,為禍人間,即成風土病。如果係咁,喺公共衛生角度,社會唯一可以重返正常秩序,可以再出街食飯、溝女、返工,就係要國民總體達某個免疫力,病毒再難以傳播herd immunity。
咁唔好問我佢哋點計出來,不過佢哋話只要六成人口有病毒抗體,隻病毒就唔會再構成威脅。
咁即係點?今時今日一個人唯一能有抗體嘅方法,就係中招後唔死。咁即係英國政府國策係要六成人中。係特登要六成人中武肺病毒呀!
咁你會問:「如果用主流專家話嘅數據,英國6,600萬人,六成中,死亡率係百分之二,咁咪要死80萬人?」
英國作為個乜戰、物戰郁親死百萬壯丁嘅民族,可能80萬又如何。英揆BoJo尋日都已話:「Many more families will lose loved ones before their time。」
不過佢哋當然冇咁堅。佢哋條數,就係諗住中招嗰六成人,如果都係啲唔會發病嘅人,例如小朋友、後生仔等,嗰啲人嘅死亡率得百分之零點幾,咁就搞點。淨番嗰四成人就可從山洞中爬番出來。
不過,問題係條數點來。冇錯,啲唔同年齡中招者嘅死亡率,係靠大陸數據囉。大陸數據呀!我作為前殖民地英女皇嘅子民,仲要喺金融業打滾,真係想同佢哋話,大陸數據呢味嘢,信佢一成,雙肺失靈呀。咁嘅料都信已黐孖筋,仲要係攞來做豪賭千萬生命嘅依據。
好啦,我唔知英政府喺未來大約兩三個禮拜後,即當全國上下深切治療床位爆滿嗰刻,會否後悔轉軚。不過如果佢哋國策係諗住特登想國家六成人染病毒,我今日強烈建議喺英國嘅老人家要即走。因為你不幸誤中做collateral damage嘅機會非常高。
而今日唔走,唔知喺十日八日後,當英國變成Lombardy時,香港、新加坡、台灣等地,仲畀唔畀你入境了。住英的前輩們,您可能覺得英政府癲咗,不過唔明帝國級公共政策的您,早走早著啊。
-----------------------------
【武漢肺炎】專頁 全民自救 抗疫資訊盡在《蘋果》
-----------------------
屬於香港人的移民攻略
立即登入
【全球樓行】 Dream House零距離