任賢齊唱得作得又演得，最近仲踩埋入導演界，自導自演拍浪漫愛情喜劇《落跑吧愛情》，仲搵埋性感女神舒淇合作，下個月10號就有得睇。

佢哋早排特登飛咗去台灣澎湖灣取景影海報，點知遇到季節性風暴，搞到啲schedule係咁改。小齊諗住親自落水影靚爆珊瑚礁，但係隻船勁搖，結果佢暈浪狂嘔，真係冇陰功！

黑嘅唔止呢樣，小齊仲因為當地超毒太陽，搞到曬黑咗！不過佢話自己黑事小，反而係有化妝品代言嘅舒淇，要包到冚嚟避太陽，小齊仲話會預啲budget去買mask同美白產白，而舒淇都唔客氣，話會將啲Spa單交畀小齊找數。

其實今次係小齊同舒淇自1999年嘅《玻璃樽》後，相隔16年再合作，初次執導嘅小齊話好彩有舒淇畀咗唔少創作意見，等佢易啲寫劇本，難怪小齊等足舒淇（個檔期）3年啦！抵晒！而且舒淇更提供旅行經歷做參考，所以有部份故事嘅內容係佢嘅真人真事。

另外，小齊亦喺片中加入歌舞劇情，仲請到舒淇開金口合唱主題曲，佢勁推舒淇歌喉，唔止要請對方做個唱嘉賓，仲話要同老闆推薦出碟，但舒淇話自己會唱爆玻璃喎！