潘頓雖為香港騎師二哥，但不少散戶都傾向做其淡友，皆因他跑馬一時一樣，常與賽前預計有落差，就連專業人士也會中招。

就像剛周三（13日）騎師王，開賽前潘頓不足兩倍兼且落飛，結果這位二哥全晚守齋，還要尾場騎熱門「慣勝聆聽」，對面直路步速唔快仍然死留到包尾，但潘頓在同類步速場合選擇提早發力，較早場次已有跑第二的「進綵」做過，咁「慣勝聆聽」點解唔嘗試照辦煮碗？應該潘頓先識答。

當然雷神剛周三晚同樣食白果，過往出現類似格局，騎者打後場次多被追纜客打熱，但這趟最後三場，雷神最熱一匹座騎「情趣」亦有46蚊，真的不得不佩服人家「料事如神」。這正好解釋，為何市場充斥不少莫雷拉基金盤。

開季至今，最信得過的騎師原來是田泰安，入Q率接近四成確厲害，所以騎者周六出馬滿額。

當中第五場「和諧氣氛」上季尾配田泰安跑泥地打叠入位，今次人馬跨季捲土重來，以「和諧氣氛」前季曾在今戰四班泥地一哩初出贏馬，有力取勝。