上年十月上流社會有流言指前藝人鄺美雲係賭王何鴻燊嘅「五姨太」，頓時成為城中熱話，兩位事件嘅男女主角都先後否認，賭王嘅四姨太梁安琪更戲言，若傳聞屬實，佢會為賭王擺幾圍酒賀一賀。
賭王同四姨太噚日去澳門馬場做耀榮娛樂盃嘅嘉賓，鄺美雲亦應張耀榮之邀過咗梳打埠。流言中嘅三個主角碰頭，唔單止冇尷尬，重有傾有講，言笑甚歡。
鄺美雲先到場，賭王同四姨太遲咗約一個鐘先嚟。當三人發現自己成為全場焦點後，本來坐喺隔籬枱嘅四姨太走過去同鄺美雲打招呼，八方聽到鄺美雲同四姨太講：「唔好意思，下次請番你食飯。」
四姨太「五十蚊」即五千
八方諗住同賭王傾吓偈，旁邊嘅四姨太叉住腰插嘴：「唔使答，問埋啲無聊問題，你哋好唔好意思？」記者之後扯開話題問四姨太有冇心水馬，佢話：「唔知，我啱啱到，我淨係買咗五十蚊。」賭王聽到即刻話：「佢五十蚊即係五千蚊。」四姨太跟住問記者：「你哋冇嘢問嘞？」賭王就話：「你閘住晒，重有乜嘢問吖？」四姨太連隨打圓場話馬場好靚。