張志熔旗下的造船企業熔盛（1101），早排先爆出周轉不靈，無錢出糧，最後要搵老友鄭家純（純官）認購可換股債券（CB）科水。
另一邊廂，張志熔卻向另一間旗下的地產公司恒盛（845）提出私有化。消息喺10月底一傳出，市場人士普遍嘅第一個反應就係：佢有錢咩？一個月之後通告出爐，謎底終於解開：公告中表明，張志熔私有化的資金，是透過借貸支付的。
不惜借錢都要搞私有化，𠵱家利息唔係錢咩？如果無着數，一如公司通告中所講，係為了「改善公司聲譽及員工士氣」，你信唔信丫？張志熔出價每股1.8元，雖然較停牌前高45%，但以恒盛本來就較每股資產淨值（NAV）有大幅折讓嚟計，呢單deal對張生仍然係非常着數。
截至6月底止數字，恒盛每股NAV大概近3蚊左右，即係私有化價格仲折讓緊NAV至少40%，張生只係用45億元現金，就可以獲得差唔多229億元資產的全部控制權。
有芬佬朋友直言，恒盛雖然好多項目嘅質素一般，但旗下嘅尚海灣卻相當值錢，只係公司一直唔肯減價，拖慢嚟賣，𠵱家私有化，將資產拆骨出售，仍然有大把水位賺，當然借都借到舊錢返嚟，完全唔使意外噃。

今次恒盛私有化，不是透過一般要約（General Offer）的方式進行，而用協議安排方式、開股東會表決（要75%出席兼獨立股東同意、不多於10%全部獨立股東反對），反映張志熔無意增持，不成功便成仁。如果最後搞唔掂，相信恒盛遲早會賣產或者賣殼。

海迪

有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange