亞姐王家敏、周嘉莉今日喺深水埗出席亞視「勵志歌曲創作大賽」活動，王家敏話呢個7月，去咗內地好多地方工作，有拍亞視節目同埋樓盤剪綵等，已經好耐冇返屋企：「今次都好狼狽，因為唔夠底褲用，嗰度地方比較偏僻，又冇紙底褲賣，要自己喺酒店洗。」

咁咪掛到成間酒店房都係內衣褲？佢話：「係呀，點知洗完又唔係好乾，乾咗都好似有啲味，但冇法，都要照着，仲要咁啱撞正月事，好彩附近超市都有得賣衛生用品。」

王家敏話之後再出trip，會準備定多啲紙底褲。講到王家敏都屬於《仁美清叙》，提到羅霖自爆曾有家暴，佢話冇聽過，呢啲係佢家事唔方便講，不過知佢好比心機做嘢。問佢如果男友咁對佢係咪唔會原諒？佢話唔會原諒，男士要有風度，冇理由郁手，打女人始終唔好。