和平佔中如箭在弦，只要政改方案唔合乎真普選原則就「中環見」。佔中發起人戴耀廷噚日出席華人民主書院搞嘅非暴力抗爭論壇，講講吓仲即場諗到一個零暴力而又消耗警力嘅佔中方法。

戴耀廷話，聽聞正規做法，警方清場抬人，係要六個警察抬一個示威者。佢笑住話要招募200磅以上嘅勇士做佔中先鋒隊，實行抬到警察氣咳。雖則戴教授呢個肥人作戰計劃係講吓笑，不過八方都好認真咁幫佢度過，其實泛民「肥勇士」唔多，目測有資格入先鋒隊嘅有壹傳媒集團主席黎智英、人民力量「大嚿」陳偉業、社運老將阿牛曾健成同古桂耀等。
至於戴教授本人，搞佔中之後瘦咗成個碼，佢𠵱家梗係冇200磅啦，仲笑言終於有藉口同老婆講唔使減肥住囉。

諗緊持久戰定打游擊

不過呢，有警察朋友同八方講，其實清場抬人時，冇硬性規定要六抬一，其實只要雙數警員抬人就OK，兩個亦得、四個都得。不過八方心諗，如果位位佔中人士都過200磅，咁要六個抬一個，又唔係天方夜譚。
其實𠵱家距離佔中仲有一年時間左右，戴耀廷話要認真諗吓佔領嘅方式，到底係無限期佔領，定佔一日後十日再返去佔過，佔兩日又閃人，游擊式拉長戰線同保留實力；又或者講好有ABC幾個佔領點，怕且到時警方派出嘅警力已經佔領咗中環，佢哋就移師另一個地點佔領囉。
不過，講到尾公民抗命最緊要係公民參與，所以佔中嚟緊要諗計吸引游離市民支持，例如做民調睇吓市民接受乜嘢方式嘅非暴力抗爭。

李八方
mailto:[email protected]

肥佬黎有今日，全賴阿媽細個同佢講過乜？即睇最新一集《亂噏24》，話唔定幫到你！
http://bit.ly/appletalk24