美國百變天后LadyGaGa於情人節接受男友TaylorKinney求婚，唔知係咪有愛情滋潤幸福得滯，GaGa竟然越嚟越脹，佢上個禮拜六係巴哈馬開騷，翌日就於當地沙灘同大班老友玩，着比堅尼上陣嘅佢十分盡興，但就凸肚腩，大殺風景。

GaGa着起色彩繽紛嘅比堅尼同大班老友現身沙灘，露出左半身多個紋身，GaGa仲拎住疑似酒精飲品同男友人邊唱邊跳，左手無名指仍然戴住Taylor送贈嘅心形訂婚鑽戒，唔捨得除。

不過GaGa嘅身形比之前明顯發福唔少，不但凸出肚腩仔，仲現埋巨躉，GaGa仲否咗自己盛傳懷孕嘅消息㖭。