羅明珠與導演高志森第一次見面是1984年一個凌晨。那時高志森還是新丁，籌拍第一部電影——《開心鬼》。因為《開心鬼》開拍前數月女主角倪淑君突然辭演，新藝城員工Winnie即向高志森引見姪女——就是羅明珠。高志森憶述:「我好記得嗰日係即晚凌晨見羅明珠，佢係臨危受命。」

回想那夜凌晨的casting經歷，高志森說：「直情好okay，首先佢唔怕醜，又多嘢講仲多嘢講過我，見面嗰分幾鐘有佢講冇我講。樣生得好，條件又好好，最緊要唔怕醜，嗰個年代好難得。」那年羅明珠僅15歲半。(新聞連結: http://bit.ly/1THgICQ )

轉眼31年過去。羅明珠與高志森最後一次見面，是今日，在香港殯儀館壽山堂。羅明珠上月27日因心臟病猝逝，終年47歲。

高志森約下午5時左右抵達靈堂，逗留一段時間，離開時說:「有望到佢一眼，好大感受，因為佢太年輕太後生。當年我第一部做導演，佢做女主角嘅《開心鬼》，識咗超過30年，啲人話佢唔同咗樣，但我就覺得好似當年識佢時一樣。」

憶述與羅明珠的合作，高志森說：「同佢合作唔多，我曾經策劃過一套《為妳鍾情》，套劇仲有珍妹(李麗珍)，之後我去咗德寶，佢留喺新藝城，合作機會唔多，只係合作咗一部半電影。之後喺機場見過幾次面。我哋冇乜緣份合作。不過羅明珠算係我帶佢入行，因為當時喺我做casting。」

記者之後問到高志森有否見到羅媽媽？他表示：「有，佢不斷落淚，冇停過，始終係白頭人送黑頭人，叫佢要注意身體。」至於羅明珠家中經濟狀況？他稱：「唔知，同佢屋企唔熟，耐唔耐見到佢嘅新聞，雖然相隔30幾年，但時間過得好快，感受好深。」