【新增內容】
現年26歲嘅韓國「馬舞女」泫雅上月認戀同門師弟團PENTAGON嘅24歲成員E'Dawn，坦言兩人而交往兩年，又公然大方放閃，此舉似乎激嬲所屬嘅CUBE事務所，E'Dawn隨即被公司雪藏。對於兩人嘅態度，粉絲亦唔賣帳，有唔少粉絲希望E'Dawn退出PENTAGON，而E'Dawn上周五透過官方粉絲論壇發文，首度向粉絲道歉。

不過CUBE今日就突然發出聲明，稱無法與泫雅、E'Dawn恢復信賴關係，所以決定將兩人踢出公司，消息震驚外界。CUBE嘅聲明上寫道：「我哋喺管理藝人方面，一直以互相信任、信賴為優先，但喺經過無數次嘅討論後，發現已經無法回復和泫雅、E'Dawn之間嘅信任，決定將兩位藝人退社，亦真心感謝一直支持着嘅粉絲，謝謝大家。」

另外，有韓媒爆料，指泫雅及E'Dawn事前冇收到公司通知，二人都係睇新聞先知道自己已經被公司解約，對於公司嘅決定，二人都有啲不知所措。

隨後有CUBE嘅相關人士表示，公司聽取藝人意見後，決定開緊急會議再討論泫雅及E'Dawn嘅事。

據知CUBE嘅大股東都唔希望直接踢走泫雅及E'Dawn，不過事務所方面就強調已經決定踢走二人，表示：「已經落實踢走佢哋，冇挽回嘅餘地。」

而CUBE嘅股價今日就暴跌，於韓國時間下午1時30分左右，CUBE嘅股價比前一日急跌9.76%，之後有所回升，但收盤時依然比前一日下跌6.57%，公司市值蒸發48億4,484萬韓圜（約3,393萬港元）。

由於CUBE嘅大股東及事務所持不同立場，搞到消息混亂，CUBE最終發聲明反口未決定踢走泫雅及E'Dawn，表示將於下周舉行理事會議，討論兩人嘅去留問題。

精選韓流，喺晒《娛果》
http://fb.com/appledailyent