唐詩詠同王浩信(Saving)噚晚喺銅鑼灣皇室堡出席父親節活動，呢對「撒嬌效應」後爆紅嘅「情侶檔」，最近成為活動常客，佢哋喺活動上同粉絲玩遊戲互動，又唱歌，當然啦......必定有集集都播幾次嘅《陪着你走》一曲啦。

唔止觀眾聽到厭，原來為咗練呢首歌，就連王浩信嘅囡囡都聽咗過千次，Saving話：「期待父親節同個女一齊唱㗎！好開心入行咁耐，最近憑呢首歌攞到一個消費平台嘅No 1.，真係要多謝盧冠廷先生。」Saving仲話嚟緊會有首合唱歌出街，就係同菊梓喬合唱《溏心3》嘅片尾曲。

詩詠就話已經準備好父親節點過，佢話：「因為爸爸鍾意食生果，翠如BB會去馬來西亞，會叫佢空運兩個榴槤返嚟。」而王浩信就好期待父親節，佢話：「都會陪屋企人，好期待囡囡會送驚喜，佢好鍾意表演，就算送卡仔畀我都好開心，細個我都會送立體嘅卡畀爸爸，我都好想收返。」

講到佢哋合作搞飲食生意開實體店，佢哋就話已經努力緊，希望今年可以成事，仲預算會用6位數字投資金額，王浩信話：「錢方面佢叻過我，佢係金牛座，好叻理財。」