近年所見一眾澳洲騎師，或在港已經搵食多年之過江龍，陣上太多不切實際鬥直路功夫，往往更見韁繩鬆，令馬匹得唔到最大互動節奏，有些更輸得有點難睇，咁其實係特登咁做，定功夫未真正到家？

記得八十年代，英國有好幾位殿堂級高手如柏葛、繆沙、魏德禮、嘉遜等來港客串，每次他們來到，會令班澳洲騎師立即好似變成二打六，每每鬥直路都大多鬥輸，當時你會見呢班英國高手放馬放唔斷，鬥後勁又段段有，真係眼界大開，但佢哋鬥後勁，少之又少要分韁再分韁，又不會打前腳又打後腳，韁繩一收準就一直推騎至終點，而且少見佢哋打鞭隻馬會內閃又外閃，根本一條直線衝終點。

相反目前騎師不斷玩韁繩又換鞭，而且往往令馬內閃外閃，其實好難睇。感覺上有某些騎師就像賭神一樣，特登某啲場合加上去，到要執行任務時候，大條道理話自己騎馬風格係咁，而且又往往過骨，佩服。

今期(24日)沙田賽事我特別喜歡第八、九場。第八場「雲信凡高」今季先在1000米直路賽表現爭逐興趣，上仗跑大家唔注意之泥地1200米，果然性能特別好走入冷Q，復課潘頓立即再親自快操，狀態似更進一步，坐位望贏。

第九場「家品皇者」上場初出，感覺得七成狀態下贏對手2.5馬位，復課操練更辣更fit，今仗升班但磅輕，莫仔頭馬之選，沈集成憑「雲信凡高」、「家品皇者」贏第八口孖寶可能性非常高。

文：沈國成(Now668台賽馬評述員，Now668台今期賽日中午12時直播賽馬直擊)