【新增影片】

轉會窗關閉前由摩納哥以借將身份加盟巴黎聖日耳門嘅基利安麥巴比，周三攜眷出席新東家為他舉辦嘅發佈會，攞住佢入「門」後嘅29號球衣，亮相巴黎王子公園球場。

麥巴比一家人周三踩上王子公園球場嘅草地影相拍照，包括佢老竇、叔父同細佬等等。平時睇麥巴比好似好瘦削咁，但睇佢哋成家人，其實都幾大件頭，可能未來退休後，麥巴比都會變成佢老竇咁嘅款，慢慢發福。

麥巴比會以借將身分效力一年，之後PSG就會用1.6億鎊（約16億港元）正式簽佢，但呢位新亨利受訪時，就話身價唔到佢控制：「呢個身價又唔係我定，而且筆錢又唔會落我個袋，只可以同大家講，呢樣嘢唔會改變我嘅生活模式同踢波風格。」另外，佢亦話喺尼馬加盟PSG前，球會已經密斟佢，雙方已經傾緊，但自從落實呢位巴西球星加盟後，佢就更加想去巴黎踢波咁話喎！