剛戰（18日）打吡賽日莫雷拉連場大熱門倒灶，「巴基之星」、「代代為王」同「激賞」全部跑梗頸四，只係贏隻半熱門「人民武士」，盲目捧佢想唔輸都幾難。

賽後唔少馬迷非常唔滿意「巴基之星」同「激賞」嘅末段騎法，無疑莫雷拉可以騎得狠啲，馬迷質疑絕對有道理，但係競賽小組覺得問題唔大，大家都係得個嘈字。

莫雷拉今季表現大起大落已經司空見慣，可以一日掃幾場，亦可以全日三甲不入，佢嘅馬買又唔係，飛咗佢又隨時被佢篤爆，非常難估。

跑馬都係逐個賽日計，打吡賽日莫雷拉令人失望，今次（21日）谷草夜馬會唔會大反底又贏幾場？淨係估佢手馬都諗爆頭。

莫雷拉今晚騎足八場，較特別嘅係佢今晚騎嘅第一場「幸運神駒」、第二場「霸勝」、第四場「金碧輝煌」同第七場「咪走寶」都係新接手嘅馬。

呢幾隻馬本身都係華將騎開有表現，家陣全部換晒莫雷拉，點計牌面都係加強配搭，而除咗「幸運神駒」，其他三隻馬全部抽到靚檔，全部贏晒都未必冇可能。當然，跑馬永遠唔會正頭正路，亦有可能呢幾隻馬換莫雷拉跑得仲差。

好多馬主仍然深信，搵莫雷拉騎自己隻馬，贏面即刻高好多。無可否認，莫雷拉初初嚟香港長期策騎時，確係能人所不能，好多馬就係靠佢騎功搭夠先贏到。

但係時間耐咗，莫雷拉嘅瓣數已經被對手睇通，佢陣上嘅拼勁亦似乎唔及以前，客觀睇佢今季嘅表現，馬主搵莫雷拉騎馬，輸嘅機會多過贏。

呢晚幾隻華將轉莫雷拉嘅馬，係咪跑得更好就真係要跑完先知，但賠率肯定熱上加熱。何況莫雷拉跑夜馬嘅成績遠遠唔及日馬，今季亦試過全晚零上名，隨時又係贏一場，馬迷真係要臨場執生。

阿Joe