阿爺剛啱鬆綁內房限購令呢個緊箍咒冇幾耐，就喺上個禮拜五晚，再忽然減息，好明顯刺激內房政策力度加強，要睇內房股，冇得走雞，點都係揀五礦建設（230）。
場內專家估計，呢次祖國年內第一次減息，係政策趨向寬鬆，兼且係第一步，日後會陸續有嚟，已經畀殘到爆嘅內房有炒賣嘅話題。而阿爺放水刺激經濟，內房亦都係實實在在受惠者。

炒注資好和味

再睇五礦建設，家陣0.4倍PB，其餘四隻央企內房當中，中國海外（688）1.5倍、方興地產（817）0.6倍同華潤置地（1109）1.2倍。五礦建設係計保利置業（119）之後（0.38倍PB），第二隻PB最平嘅選擇。
更吸引嘅係，新一屆領導層，實行央、國企改革，同走出去政策，五礦建設對口係超重量級央企五礦集團。諗到嘅係，喺面向世界，央企角色應該越嚟越吃重；又本地份屬央企嘅上市公司，亦都享受改革政策下帶嚟嘅優質注資機會。
唔只講過一次，五礦建設對口嘅礦集團掌舵周中樞講明，未來五礦建設有機會獲注資，規模達到300億元。五礦建設喺五家央企內房中，係最有機會喺嚟緊睇得見日子，俾阿媽湊到肥肥白白。而五礦建設家陣市值，都係得31億元多啲，得可能注資規模嘅十分之一，太奀。
又唔計潛在注資，五礦建設家陣揸住土儲，樓面面積上到4,713萬平方呎。食住阿爺揼水刺激經濟樓市，呢批土儲每方呎只係增值100蚊咁大把，五礦建設每股已經額外多咗1.4元，五礦建設現價都係得0.96元。又連埋增值計數，集團PB得0.25倍，吸引到痹。煲五礦建設，翻一番到1.8元，PB得0.49倍，市值62億元咁大把。

錢雋
細價股專家
本欄逢周二、三、五刊出